Kröftugt atvinnulíf og nýsköpun
Sjálfstæðisflokkurinn vill skapa jákvæða hvata fyrir framfarir og verðmætasköpun í Reykjavík. Tryggja þarf að opinber kerfi hafi hvetjandi, en ekki hamlandi áhrif á frumkvæði og framtak í borginni.
Við viljum að borgin verði eftirsóknarverður kostur fyrir atvinnulíf og nýsköpun. Við viljum auka framboð atvinnulóða í borginni og lækka fasteignaskatta á atvinnuhúsnæði.
Við teljum mikilvægt að styðja betur við nýsköpun og hugvitsdrifna atvinnustarfsemi. Við viljum að borgin laði að sér innlenda sem erlenda sérfræðinga og hyggjumst skipuleggja nýsköpunarþorp í Örfirisey.
Við viljum aðstoða fólk aftur á vinnumarkað og efla það til sjálfshjálpar. Við teljum rétt að bjóða ráðningastyrk í 12 mánuði með þeim einstaklingum sem þiggja fjárhagsaðstoð hjá borginni.