Fjármál
Sjálfstæðisflokkurinn telur mikilvægt að rekstur borgarkerfisins verði endurskipulagður. Stjórnkerfi borgarinnar hefur orðið að bákni - minnka þarf yfirbyggingu, stöðva skuldasöfnun og sýna ráðdeild þegar sýslað er með fjármuni borgarbúa. Sjálfstæðisflokkurinn veit að svo bjóða megi öfluga grunnþjónustu verður fjárhagur borgarinnar að vera traustur.
Við teljum löngu tímabært að minnka yfirbygginguna, stöðva skuldasöfnunina og hagræða í rekstri borgarinnar.
Við teljum rétt að borgin dragi úr samkeppnisrekstri.
Við viljum lækka fasteignaskatta á atvinnuhúsnæði og munum vinna áfram að lækkun skatta um leið og forsendur hafa skapast.
Við munum þrýsta á um lagabreytingu svo fækka megi borgarfulltrúum úr 23 í 15.
Við teljum nauðsynlegt að ná fram hagræðingu innan borgarinnar með einföldun kerfa og rafrænni stjórnsýslu.